Ushtria izraelite nis një operacion “ndaj terrorizmit” në veri të Bregut Perëndimor

Ushtria izraelite njoftoi të mërkurën një operacion të ri “ndaj terrorizmit” në veri të Bregut Perëndimor.

Shërbimi ushtarak dhe i sigurisë së brendshme thanë në një deklaratë të përbashkët se ata “filluan të vepronin si pjesë e një operacioni të gjerë kundër terrorizmit në zonën e Samarisë veriore”, duke përdorur termin biblik izraelit për një pjesë të Bregut Perëndimor.

Ushtria izraelite tha se operacioni ishte i ri dhe jo pjesë e operacionit të saj kundër terrorizmit “Muri i Hekurt” i nisur në janar 2025, i cili synon kryesisht kampet e refugjatëve palestinezë.

Dhuna në Bregun Perëndimor, të cilin Izraeli e ka pushtuar që nga viti 1967, është rritur ndjeshëm që kur sulmi i Hamasit ndaj Izraelit shkaktoi luftën në Gaza në tetor 2023.

Ndërkohë, sulmet nuk kanë pushuar pavarësisht armëpushimit që hyri në fuqi në 10 tetor.

Sakaq, trupat ose kolonët izraelitë kanë vrarë më shumë se 1,000 palestinezë , shumë prej tyre militantë, por edhe dhjetëra civilë, në Bregun Perëndimor që nga fillimi i luftës, sipas një llogaritjeje të AFP bazuar në shifrat e ministrisë palestineze të shëndetësisë.

Të paktën 44 izraelitë, përfshirë ushtarë dhe civilë, janë vrarë në sulmet palestineze ose në operacionet ushtarake izraelite, sipas shifrave zyrtare izraelite.

LEXONI GJITHASHTU:

• Përmbytje të mëdha në të gjithë Izraelin, shpëtohen dhjetëra persona
• Ushtria izraelite shkarkon 3 gjeneralë për sulmin e 7 tetorit