Ushtria izraelite vrau tetë mjekë në Gaza, Kryqi i Kuq: Sulmi më vdekjeprurës…

Federata Ndërkombëtare e Shoqatave të Kryqit të Kuq dhe Gjysmëhënës së Kuqe (IFRC) ka shprehur zemërim të dielën pas vrasjes së tetë punonjësve mjekësorë të Shoqatës së Gjysmëhënës së Kuqe Palestineze (PRCS) në Rripin e Gazës.

Në një deklaratë, rrjeti humanitar më i madh në botë e cilësoi këtë si sulmin më vdekjeprurës ndaj personelit të tij që nga viti 2017.

“Jam zemërthyer. Këta punëtorë të përkushtuar të ambulancës po ndihmonin të plagosurit. Ata ishin humanitarë dhe mbanin emblema që duhej t’i mbronin. Ata nuk duhet të kishin humbur jetën”, deklaroi sekretari i përgjithshëm i IFRC, Jagan Chapagain

Trupat e viktimave u gjetën pas shtatë ditësh, pasi u mohua aksesi në zonën e Rafahut ku u panë për herë të fundit. PRCS konfirmoi se bashkë me ta u gjetën edhe trupat e gjashtë anëtarëve të mbrojtjes civile të Gazës dhe një punonjësi të agjencisë së OKB-së. Një tjetër oficer i ambulancës mbetet i zhdukur.

Ushtria izraelite (IDF) pranoi të shtunën se kishte qëlluar mbi autoambulancat, duke i identifikuar ato si “automjete të dyshimta”. Në një deklaratë për Agence France-Presse, IDF tha se kishte hapur zjarr ndaj automjeteve të Hamasit dhe eliminuar disa militantë, por pas një hetimi fillestar u përcaktua se disa nga automjetet e qëlluara ishin ambulanca dhe kamionë zjarrfikës.

Hamasi e dënoi sulmin, duke e cilësuar atë një krim lufte. Incidenti ndodhi në lagjen Tel al-Sultan të Rafahut, vetëm disa ditë pas një ofensive të përtërirë izraelite në zonën afër kufirit egjiptian. Bombardimet në Gaza rifilluan më 18 mars, duke thyer një armëpushim që kishte zgjatur pothuajse dy muaj.

LEXONI GJITHASHTU:

• OBSH apelon për 8 milion dollarë ndihmë humanitare nga tërmeti në Mianmar
• Përplasja e trenit kontaminoi zonën, shpallet gjendja e jashtëzakonshme në Hustopeçe