Vakanca në Kushtetuese dhe realizimi i reformave, Ruçi pret në zyrë ambasadoren Yuri Kim

Kryetari i Kuvendit, z. Gramoz Ruçi, priti sot ambasadoren e ShBA, znj. Yuri Kim.

Përmes një njoftimi për mediat, zyra e Kuvendit bën me dije se gjatë takimit u diskutua mbi ecurinë e reformës në drejtësi, të reformës zgjedhore dhe përshpejtimin e plotësimit dhe bërjes funksionale sa me shpejt të Gjykatës Kushtetuese dhe Gjykatës së Lartë.

“Kryetari i Kuvendit, z. Gramoz Ruçi, vuri në dukje se Kuvendi është maksimalisht i angazhuar për suksesin e reformës në drejtësi, të reformës zgjedhore dhe realizimin e pritshmërive të qytetarëve shqiptarë, si kushte thelbësore për të nxitur e mbështetur progresin e Shqipërisë, në konsolidimin e demokracisë dhe zhvillimin e vendit”, thuhet në njoftimin e Kuvendit.

Po sot presidenti i republikës, Ilir Meta pritet të takohet me kryeparlamentarin Ruçi me kërkesë të vetë kreut të shtetit, ku do diskutohet po ashtu për vakancën e krijuar në Gjykatën Kushtetuese dhe plotësimin e saj sipas rekomandimeve të Komisionit të Venecias.