Vaksina kundër Covid-19, kryeministri Rama: Kemi rënë dakord në parim me ”Pfizer”

Kryeministri i Shqipërisë, Edi Rama, bën të ditur se ka rënë dakord në parim me kompaninë Pfizer, për të nisur në muajin janar vaksinimin kundër Covid-19.

Ai thotë se pavarësisht vështirësive të mëdha për të siguruar vaksinën, Shqipëria ka bërë hapa para duke u pajtuar me kompaninë e mësipërme, që procesi u vaksinimit të fillojë pa humbur kohë.

“Në kushtet skajshmërisht të vështira si pasojë e kërkesës globale marramendëse dhe sasisë ende tejet të vogël të prodhimit, kemi dakordësuar në parim pas kontaktesh intensive nga të katër anët, tekstin e marrëveshjes me Pfizer për të nisur vaksinimin në janar!”, shkruan Rama.

Në shënimin në “twitter”, kryeministri shprehet kritik ndaj Bashkimit Europian, i cili sipas tij bëri diferencim për vendet e Ballkanit Perëndimor, sa i përket shpërndarjes së vaksinës.

“I papranueshëm moralisht, polikisht, logjikisht diferencimi që BE-ja i bëri Ballkanit po ia dolëm sidoqoftë me diplomaci e me këmbëngulje të mos mbetemi mbrapa askujt. Dhe nuk do të ndalemi deri në sigurimin e dozës së fundit. Fjalët mbrapsht atyre që vazhduan me sharje e akuza!”, shton ai.

Akademia e Shkencave të Shqipërisë njoftoi ditën e sotme se rreth 50% e popullsisë së Tiranës e kanë kaluar Covid-19. Në këtë studim u përfshinë katër qendra shëndetësore në Tiranë, përkatësisht qendra nr. 3,7,8 dhe 9. Popullsia totale e zonave që përfshijnë këto qendra shëndetësore është 258,000 banorë.

Në studim janë marrë rezultatet e 817 qytetarëve, prej të cilëve 49.6% rezultuan se e kanë kaluar coronavirusin.

Lexoni gjithashtu:

Alban Ylli: Tirana pranë imunitetit të tufës, qytetet e tjera mund të kenë sërish valë infektimesh

Studimi i Akademisë së Shkencave: 49.6% e qytetarëve në Tiranë e kaluan COVID-19

Katër të vdekur dhe afro 600 të infektuar të rinj nga Covid-19