Lejohet vaksinimi i adoleshentëve dhe miratohet dhënia e dozës së tretë kundër COVID-19

Shqipëria do të lejojë vaksinimin e adoleshentëve nga mosha 16 vjeç e sipër, si dhe fëmijëve që kanë probleme shëndetësore nga mosha +12 vjeç.

Gjatë mbledhjes së Komitetit të Ekspertëve të mbajtur sot për të shqyrtuar situatën e COVID-19 në vend, u fol edhe për menaxhimin e dozës së tretë të vaksinave anti-COVID, grupmoshat e vaksinimit si edhe masat kundër virusit.

Kryetarja e këtij komiteti, Mira Rakacolli tha se personat mbi 60 vjeç mund të marrin dozën e tretë të vaksinës anti-COVID, 6 muaj pas dozës së dytë, duke filluar nga data 1 nëntor.

Zonja Rakacolli njoftoi gjithashtu se është ulur fasha e vaksinimit të qytetarëve nga 18 vjeç e lart, në 16 vjeç e lart.

Pavarësisht përkeqësimit të situatës së COVID-19 në vend, Komiteti i Ekspertëve bëri me dije se masat kundër virusit do të mbeten siç janë dhe se nuk do të shtrëngohen nëse zbatohen siç duhet.

Prioritet mbetet mbulimi i popullsisë me dozën e parë dhe të dytë të vaksinës, për ata që nuk janë vaksinuar.

LEXONI GJITHASHTU:

• Prindërit shqiptarë pro dhe kundër vaksinimit të fëmijëve