Deputeti i Partisë së Lirisë, Petrit Vasili u shpreh në një konferencë për mediat se qeveria ka marrë peng Parlamentin e Shqipërisë.
Vasili akuzoi parlamentin se Partia e Lirisë ka depozituar disa projektligje për diskutim dhe prej 7 muajsh nuk janë marrë për shqyrtim.
“Parlamenti po përjeton ditët më të errëta në këto 30 vjet pluralizëm, dhe pa e tepruar mund të thuhet me gojën plot që qeveria po zbaton një puç institucional për bllokimin e Parlamentit. Është e paimagjinueshme që për javë të tëra parlamenti shqiptar, vetëm në tre seancat e fundit, ka shqyrtuar gjithsej dy projekt marrëveshje ndërkombëtare, ndërsa në rendin e ditës së nesërme nuk ka asnjë projektligj të depozituar. Ndërkohë që janë depozituar projektligje nga Partia e Lirisë prej muajsh të tërë, ku ato për çmimin e naftës dhe për ndryshimet në Kodin Penal për tubimet kanë më shumë se 7 muaj të depozituar dhe që as nuk preken me dorë. Ndërkohë që Parlamenti shqyrton në mënyrë të rrufeshme çdo lloj projektligji të qeverisë, që i duhet asaj për hajdutëritë që bën apo për t’i bërë shërbim propagandës së ditës, pra projekligje që kanë zero vlerë për qytetarin, u hapet rruga katër kanatë në Parlament”, u shpreh Vasili.
Deputeti nënvizoi më tej se qeveria ka rrëmbyer e ka marrë peng institucionin themelor të shtetit shqiptar, nga ku burojnë të gjitha pushtetet, duke mbajtur një qëndrim vërtetë mafioz ndaj Parlamentit të Shqipërisë.
“Kjo situatë ngarkon me përgjegjësi të madhe kryetaren e Kuvendit Lindita Nikolla që, duke e konsideruar veten thjesht dhe vetëm si instrument të qeverisë, nuk bën asgjë por është nënshtruar e po përdoret në funksion të pengmarrjes së Parlamentit nga qeveria.
Kjo situatë duhet të marrë fund dhe gjithashtu legjitimon çdo lloj reagimi të qytetarëve, të cilët kanë votuar për një Parlament që funksionon, që shqyrton projektligje të cilat kanë lidhje me jetën e tyre dhe që iu mundëson të zgjedhurve nga populli të ushtrojnë veprimtarinë e tyre”, tha ai.
LEXONI GJITHASHTU: