Policia në kryeqytetin e Gjeorgjisë përdori gaz lotsjellës ndaj demonstruesve të mbledhur jashtë parlamentit, për të protestuar ndaj ligjit që i etiketon mediat dhe OJQ-të si elemente nën ndikimin e huaj nëse marrin mbi 20% të fondeve nga jashtë. Departamenti amerikan i Shtetit kritikoi Tbilisin zyrtar që e votoi në parim ligjin.

“Shoqëria civile, gazetaria dhe organizatat mediatike janë gurë themeli për çdo demokraci. I bëjmë thirrje qeverisë gjeorgjiane të dëgjojë paralajmërimet tona se ky ligj nuk është në linjë me normat dhe vlerat e BE-së dhe do ndikojë negativisht për të ardhmen evropiane të Gjeorgjisë”, thotë Vedant Patel, zëdhënës i Departamentit të Shtetit.

Parlamenti i Gjeorgjisë votoi të mërkurën, në leximin e parë të draftit, pro votimit të tij. Presidentja e vendit ka paralajmëruar se do të vendosë veton nëse ligji miratohet në seancën e tretë, por partia në pushtet mund ta anashkalojë atë duke mbledhur 76 vota.

LEXONI GJITHASHTU:

• Protestuesit në Gjeorgji kundërshtojnë projektligjin për “agjentë të huaj”
• Rikthehen protestat në Gjeorgji/ Shoqëria civile kundër nismës për ligjin ‘rus’