Vdekja e çiftit në Orikum, fqinjët të tronditur: Ishin njerëz të mirë, punonin bashkë burrë e grua

Fqinjët e çiftit Llogora dhe Sose Xhebroj, të cilët u gjetën të vdekur në Orikum të Vlorës, kanë folur për Euronews Albania , duke u shprehur të tronditur nga ngjarja.

“Ishin njerëz të mirë, në punën e tyre. Njerëz punëtorë. Jemi të habitur nga ngjarja. Na ra si bombë. Kanë pasur një biznesin e tyre një lokal, aty punonin. Punonin bashkë burrë e grua. Kishin dy djem”, shprehet një prej fqinjëve.

Sipas të dhënave paraprake nga policia, dyshohet se Llogora Xhebroj ka dhunuar dhe më pas ka mbytur bashkëshorten e tij, Sose Xhebroj, brenda banesës. Më pas, ai dyshohet se ka zbritur në garazh dhe ka vrarë veten me armë zjarri.

Ngjarja e rëndë është regjistruar këtë të premte në Orikum, ku Sose Xhebroj, rreth 40 vjeçe, është gjetur pa shenja jete brenda banesës, ndërsa bashkëshorti i saj, 50-vjeçari Llogora Xhebroj, është gjetur i vrarë në garazh.