Vendimi, Garda do të mbrojë kryetarin e PD-së dhe personalitete të tjera

Në mbledhjen e sotme të qeverisë është miratuar zgjerimi i listës së personave, të cilët do të mbrohen nga Garda e Republikës.

Mes emrave që do mbrohen janë kryetari i Bashkisë së Tiranës, Erion Veliaj, kryetari i Komisionit Qendror të Zgjedhjeve, Ilirjan Celibashi si dhe kryetari i PD-së Lulzim Basha, i cili ka qenë më parë i mbrojtur.

Pjesë e listës, që duhet t’i mbrojë Garda janë gjithashtu kryetari i mazhorancës, Kryeprokurori i Përgjithshëm, kreu i Kontrollit të Lartë të Shtetit, drejtuesi i SHISH deri tek ambasadori i Bashkimit Evropian në Shqipëri.

Disa prej personaliteteve që u garantohet mbrojtja nga Garda:

• Prokurorin e Përgjithshëm
• Kryetarin e Kontrollit të Lartë të Shtetit
• Drejtorin e Shërbimit Informativ të Shtetit
• Kryetarin e partisë më të madhe të mazhorancës parlamentare
• Kryetarin e partisë më të madhe të opozitës parlamentare
• Anëtarët e Këshillit të Ministrave
• Guvernatorin e Bankës së Shqipërisë
• Kryetarin e Bashkisë së Tiranës
• Inspektorin e Lartë të Drejtësisë
•  Ambasadorin e Bashkimit Evropian në Shqipëri.

Sipas VKM-së, Garda duhet të kujdeset edhe për banesat ku jetojnë, akomodohen apo dhe objektet, në të cilat kryejnë veprimtarinë e tyre emra dhe personalitete nga politika dhe drejtësia, mes të cilëve ambsadori i BE-së dhe zëvendëskryeministri.

Mbrojtje për banesat e: 

• Zëvendëskryeministrit
• Ministrit përgjegjës për çështjet e rendit dhe të sigurisë
• Drejtorit të Shërbimit Informativ të Shtetit
• Prokurorit të Përgjithshëm
• Ambasadorit të Bashkimit Evropian në Shqipëri.