Vendimi për negociatat me BE-në, ish-zv. ministrja e Drejtësisë: Dje në mbledhje pati një mungesë lidershipi

Ish-zv.ministrja e Drejtësisë, Fjoralba Caka u shpreh në Euronews Albania se dje në mbledhjen e Këshillit të Çështjeve të Përgjithshme të BE-së u pa një mungesë e një lidershipi të fortë.

“Rezultati nuk ishte ai që ne do të dëshironim dhe patjetër kjo hedh në një farë mënyrë dyshime ose pakënaqësi rreth kredibilitetit të politikës së zgjerimit të BE me vendet e Ballkanit Perëndimor”, u shpreh znj. Caka.

Ajo shtoi se qasja e BE-së për të kategorizuar dyshe shtetet që duan të anëtarësohen, nuk ka bazë ligjore dhe nuk është e drejtë.

“Në këshillat evropianë krahas këtyre kritereve dhe parimit të meritës, që është parimi bazë i negociatave, po artikulohet në një farë mënyre de fakto edhe një tjetër qasje e BE-së për të bërë dyshe shtetet që duan të anëtarësohen. Të bërit dyshe të shteteve, nuk është se ka ndonjë bazë ligjore dhe nga ana tjetër nuk është e drejtë”, u shpreh znj. Caka.

Shqipëria dhe Maqedonia e Veriut nuk arritën sërish të marrin një datë për mbajtjen e Konferencës së Parë Ndërqeveritare për të nisur negociatat me Bashkimin Evropian.

Shkak u bë vetoja e Bullgarisë për problemet që ka me Maqedoninë e Veriut, lajm që u bë i ditur ditën e djeshme nga ministrja e Jashtme e Portugalisë, Ana Paula Zacarias.

LEXONI GJITHASHTU:

• S’ka datë për negociatat, vetoja e Bullgarisë për RMV bllokon edhe Shqipërinë
• Bullgaria s’ndryshon qëndrim në lidhje me hapjen e negociatave për Maqedoninë e Veriut