“Vendndodhja s’ka asnjëherë rëndësinë e përmbajtjes”, Leli i përgjigjet indirekt Ramës

Kryetari i Bashkisë së Vlorës, Dritan Leli ka reaguar nëpërmjet një postimi në Facebook, ndaj anëtarëve të Këshillit Bashkiak, të cilët nuk kanë marrë pjesë në mbledhjen online të përcaktuar nga vetë ai për ditën e sotme.

Teksa e quan një situatë jonormale mos-zhvillimin e mbledhjeve online, z. Leli thekson se ende nuk ka kuptuar arsyen e këmbënguljes së vazhdueshme që mbledhjet të zhvillohen në teatrin “Petro Marko”.

“Personalisht, nuk e kam kuptuar ende arsyen e këmbënguljes së vazhdueshme për të krijuar mizanskena në teatër, kur gjithçka ka funksionuar më së miri, siç të gjithë e dini, online”, shkruan ai.

Ndërkohë, ai i është përgjigjur në mënyrë indirekte edhe kryeministrit Edi Rama, pas përplasjeve të fundit me të, ku i ka theksuar se “vendndodhja nuk ka pasur asnjëherë rëndësinë e përmbajtjes”.

“Forma mund të jetë e rëndësishme për të krijuar karaktere e realitete imagjinare, por në atë që ne bëjmë dhe duam të arrijmë, vendndodhja nuk ka pasur asnjëherë rëndësinë e përmbajtjes!”, shkruan kreu i bashkisë Vlorë.

Ai shton se programi i tij është promovimi dhe zhvillimi i Vlorës, bashkë me programet e qeverisë, në të gjitha sferat ku mund të afrohet me zhvillimin e vendeve të rajonit.

“Uroj që të kemi të njëjtin qëllim sepse nuk ka rrugë tjetër për të ndihmuar qytetin!”, përfundon z. Leli.

Këto deklarata në distancë vijnë, pasi më 11 mars të këtij viti kryeministri Edi Rama kërkoi që Dritan Leli të përjashtohet nga Partia Socialiste

Kjo kërkesë e Ramës erdhi pasi z. Leli refuzoi të ishte pjesë e listave të PS-së për qarkun Vlorë. Sipas kreut të qeverisë, Leli preferoi karrigen dhe jo partinë.

LEXONI GJITHASHTU:

• Dështon mbledhja e Këshillit Bashkiak, këshilltarët bojkot Dritan Lelit
• Rama kërkon përjashtimin e Dritan Lelit nga Partia Socialiste
• Vrasjet në Velipojë, Rama: Kam thirrur ministrin e Brendshëm për një ristrukturim të policisë