Venezuela dënon sulmet amerikane në brigjet e Karaibeve

Ambasadori i Venezuelës në OKB, Samuel Moncada, dënoi të enjten një seri sulmesh ajrore amerikane në Karaibe si një “grup ekzekutimesh jashtëgjyqësore” dhe i kërkoi Këshillit të Sigurimit të OKB-së të nisë një hetim.

Moncada theksoi se ka pasur pesë sulme dhe 27 vdekje të raportuara që kur SHBA-të filluan të godisnin anijet në shtator.

Zyrtarët amerikanë thonë se sulmet kanë në shënjestër trafikantët e dyshuar të drogës.

Ndërkohë, Moncada i shkroi në një letër drejtuar Këshillit të Sigurimit të OKB-së se sulmet kanë në shënjestër “anije civile që kalojnë nëpër ujëra ndërkombëtare”.

“Një vrasës po endet në Karaibe. Njerëz nga vende të ndryshme po vuajnë efektet e këtyre masakrave “, shtoi Moncada.

Ai i ka kërkuar Këshillit të Sigurimit të lëshojë një deklaratë që riafirmon parimin e respektit të pakufizuar për sovranitetin, pavarësinë politike dhe integritetin territorial të shteteve, përfshirë Venezuelën.

Megjithatë, Këshilli i Sigurimit ka të ngjarë të mos jetë në gjendje të ndërmarrë ndonjë veprim mbi situatën përtej mbajtjes së takimeve, pasi SHBA-të kanë të drejtë vetoje.

LEXONI GJITHASHTU:

• Trump autorizoi CIA-n që të kryente operacione të fshehta në Venezuelë