“Veting” efektivëve të policisë, procesi i verifikimit për lidhjet me krimin

Drejtori i Përgjithshëm i Policisë së Shtetit, Muhamet Rrumbullaku ka firmosur urdhërin “Për miratimin e ‘Formularit të vetëdeklarimit’ mbi verifikimin e integritetit të punonjësve të strukturave të Policisë së Shtetit” i cili duhet të plotësohet deri më 30 Qershor.

Procesi i verifikimit të integritetit do të nisë me vetëdeklarimin e punonjësve të Policisë së Shtetit lidhur me të dhënat për sigurinë si:

-Dënimi ose jo me vendim gjyqësor të formës së prerë nga autoritetet gjyqësore shqiptare ose të huaja, apo me vendim gjyqësor jopërfundimtar për një çështje penale të pazgjidhur me vendim gjyqësor të formës së prerë;

-Shkelja ose jo e rregullave të sigurisë së informacionit të klasifikuar dhe tentimi ose jo i kryerjes së aktivitetit të paautorizuar në sistemet e komunikimit të informacionit të klasifikuar;

-Qenia ose jo në hetim ose gjykim nga autoritetet shqiptare ose të huaja për vepra penale;

-Qenia ose jo i ndaluar ose arrestuar nga organet ligjzbatuese shqiptare ose të huaja për vepra penale;

-Caktimi ose jo i ndonjë mase shtrënguese të sigurisë personale;

-Lëshimi ose jo i një urdhri kërkimi kombëtar ose ndërkombëtar për vepra penale;

-Pasja ose jo e kontakteve të papërshtatshme, komunikimeve elektronike ose çfarëdolloj mënyre tjetër takimi apo komunikimi të qëllimshëm, me persona të përfshirë në krimin e organizuar;

-Pranimi apo shkëmbimi, ose jo, i parave, favoreve, dhuratave ose pasurive me persona të përfshirë në krimin e organizuar.

Pak ditë më parë Euronews Albania ka siguruar formularin mbi verifikimin e integritetit që duhet të plotësojnë të gjithë punononjësit e Policisë së Shtetit.

Kryepolici Rrumbullaku thekson se pastrimi i strukturave nga elementë të cilët shkelin ligjin dhe betimin është një proces prioritar dhe i rëndësishëm.

Më tej ai shprehet se askush që cenon besnikërinë ndaj uniformës së shenjtë të Policisë së Shtetit nuk do të ketë vend në strukturat e saj.

LEXONI GJITHASHTU:

• Vetingu në polici, konfirmohet në detyrë zyrtari i AMP
• Vetingu në polici, drejtori i Kufirit në Gjirokastër para Trupës së Vlerësimit