Vetingu mund të mbyllet deri në 2024, thotë juristja

Nëse zgjatja e mandatit të organeve të vetingut votohet nga Kuvendi procesi mund të mbyllet deri në fund të 2024.

Kështu tha juristja Aurela Anastasi gjatë emisionit ‘Sot’ në Euronews Albania.

Sipas saj, procesi i vetingut është zvarritur për disa arsye, mes të cilave pandemia.

“Kanë pasur pengesa, sidomos prej pandemisë. Ky është një nga faktorët, por ka edhe të tjerë. Solli ngadalësi në proceduar, përgjigje më të ngadalta nga subjekte, subjekte që nuk paraqiten pasi sëmuren, futen në karantinë, gjëra që nuk u parashikuan në fillim. U vendos një mandat 5-vjeçar për shkallën e parë që është KPK dhe mandati për komisionerët publikë. Disa përllogaritje mund t’i bëjmë; dhe duke pasur parasysh tempin e KPK u bë një llogaritje e atyre që kanë mbetur pa u rivlerësuar dhe mendohet se deri në fund të vitit 2024 procesi mund të përfundojë”, tha juristja Anastasi.

Vijimi i vetingut nga KLGJ dhe KLP, siç pretendohet, sipas saj do të zvarriste procesin.

“Kanë mbetur 40 për qind  e gjyqtarëve pa u vlerësuar dhe KLGJ e KLP janë të ngarkuar me punët e tyre si institucione në vitet e para të reformimit”, u shpreh Anastasi.

LEXONI GJITHASHTU:

• OSBE mbështet zgjatjen e afatit të Vetingut
• Parlamenti voton më 10 shkurt për zgjatjen e mandatit të vetingut