Politikanët që do të kundërshtojnë Vettingun ndihen të rrezikuar, paralajmëron Basha

Kryetari i PD-së Lulzim Basha tha në seancën e Kuvendit të hënën se propozimi për Vettingun e politikanëve është kundërshtuar nga ata që rrezikojnë për shkak të lidhjeve të tyre me krimin.

“Ne e kemi hedhur hapin e parë. Jam i bindur që debati nuk do të mungojë. Jam po ashtu i bindur që kundërshtarët e egër të këtij propozimi janë ata që rrezikojnë qëndrimin në këtë sallë, apo në çdo karrike tjetër që mbajnë në emër të qytetarëve, për shkak të korrupsionit dhe lidhjeve të tyre me krimin,” – u shpreh ai.

Sipas Bashës Vettingu i politikanëve do të jetë një instrument i mirë për të pastruar politikën nga të gjithë ata që kanë abuzuar dhe abuzojnë me fuqinë që u është besuar nga populli për përfitime personale.

Kryedemokrati theksoi në fjalimin e tij se ky nuk është një prioritet i PD-së por i qytetarëve.

“Kjo është një emergjencë kombëtare, një gjendje e jashtëzakonshme që kërkon mjete të jashtëzakonshme për zgjidhjen e saj,” – tha Basha ndërsa bëri thirrje për anëtarët e rinj të Parlamentit që të mbajnë një qëndrim ndaj situatës.