VIDEO/ Momenti kur mbështetësi i Trump u qëllua me armë zjarri

Aktivisti dhe komentatori i njohur konservator amerikan, Charlie Kirk, është qëlluar në qafë të mërkurën, gjatë një aktiviteti në Universitetin e Luginës së Utah-ut, në qytetin Orem. Autoritetet kanë konfirmuar se një i dyshuar është arrestuar dhe ndodhet në paraburgim.

Kirk, 31 vjeç, u transportua me urgjencë në spital dhe iu nënshtrua ndërhyrjes kirurgjikale, ndërsa gjendja e tij shëndetësore nuk është bërë ende publike. Zëdhënësi i universitetit konfirmoi për Reuters se e shtëna erdhi nga një ndërtesë pranë vendit të ngjarjes.

Video të publikuara në rrjetet sociale tregojnë momentin kur Kirk po fliste para një turme në ambient të hapur, kur u dëgjua një krismë armë zjarri. Në pamjet e pa verifikuara ende nga Reuters, Kirk shihet duke kapur qafën dhe rrëzohet nga karrigia, ndërsa të pranishmit shpërndahen në panik. Një tjetër video tregon gjak që rrjedh nga qafa e tij.

Presidenti Donald Trump, një nga aleatët më të afërt të Kirk, reagoi menjëherë në platformën X:

“Ne të gjithë duhet të lutemi për Charlie Kirk, i cili është qëlluar me armë zjarri. Një djalë i shkëlqyer nga fillimi deri në fund. Zoti e bekoftë!”

Charlie Kirk është bashkëthemelues i organizatës Turning Point USA, që promovon idetë konservatore në kampuset universitare amerikane. Ai është një figurë mjaft e ndjekur në rrjetet sociale dhe një zë i fuqishëm në mbështetje të Trump.

Autoritetet federale dhe ato lokale kanë nisur hetimet mbi ngjarjen. FBI ka deklaruar se po e monitoron nga afër situatën dhe mbështet hetimin.

LEXONI GJITHASHTU:

• Të shtëna me armë zjarri në SHBA: Qëllohet aleati i Trump
• Aleati i tij u qëllua me armë, Trump: Të gjithë duhet të lutemi për Charlie Kir