VIDEO| Momenti kur vritet komandanti i armëve bërthamore në Moskë

Një shpërthim i fuqishëm ka ndodhur mëngjesin e kësaj të hëne në Moskë, duke shkaktuar vdekjen e gjeneralit të lartë rus Igor Kirillov dhe ndihmësit të tij. Kirillov, i cili drejtonte forcat e mbrojtjes bërthamore, biologjike dhe kimike të Rusisë, u vra në juglindje të Moskës, rreth katër milje larg Kremlinit.

Shërbimi Sekret i Ukrainës (SBU) ka marrë përgjegjësinë për sulmin. Sipas mediave ndërkombëtare, pajisja shpërthyese ishte fshehur në një skuter, i cili ishte parkuar afër hyrjes së pallatit nga ku dilte Kirillov. Dyshohet se sasia e lëndës shpërthyese të përdorur ishte rreth 300 gramë eksploziv. Shpërthimi ka qenë aq i fuqishëm sa ka shkaktuar dëme edhe në disa automjete të parkuara aty pranë.

Ky sulm vjen pas një hetimi të hapur nga Ukraina ndaj Kirillovit për përdorimin e armëve kimike gjatë luftës në Ukrainë. Gjenerali ishte gjithashtu sanksionuar nga Britania e Madhe për përfshirjen e tij në përdorimin e armëve kimike.

Analistët paralajmërojnë se ky sulm mund të rrisë tensionet mes Rusisë dhe Ukrainës. Autoritetet ruse kanë kërkuar hakmarrje dhe ndëshkim për ata që janë përgjegjës për këtë atentat.

LEXONI GJITHASHTU:

• Njeriu famëkeq pas armëve kimike, kush është gjenerali i vrarë në mes të Moskës
• Vrasja e “trurit” të armëve kimike ruse: Reagon ashpër Moska, akuzat ndaj Perëndimit