VIDEO/ Një gropë karstike 12 m është shfaqur në Belsh, banorët sërisht të frikësuar

Një gropë tjetër karstike është shfaqur prej disa ditësh në qytetin e Belshit, duke rikthyer shqetësimin e hershëm në zonën e Dumresë, e njohur për formacionet karstike që ndër vite kanë krijuar rreth 84 liqene.

Gropa me diametër rreth 7 metra dhe thellësi mbi 12 metra ka shkaktuar frikë te banorët, të cilët thonë se hapësira po zgjerohet dita-ditës dhe po i afrohet rrezikshëm banesave.

Sipas komunitetit lokal, situata ka përkeqësuar ndjesinë e pasigurisë dhe kërkohet ndërhyrje e menjëhershme nga autoritetet për të shmangur pasoja të mundshme. Banorët thonë se fenomeni po avancon me shpejtësi dhe se rreziku sa vjen e shtohet.

Ndërkohë, autoritetet vendore u kanë bërë apel banorëve të qëndrojnë larg gropës, veçanërisht fëmijëve, të cilët rrezikojnë më shumë për shkak të mungesës së ndërgjegjësimit ndaj pasojave. Frika është e ndjeshme jo vetëm në një familje, por në të paktën 4 ose 5 banesa që ndodhen më pranë formacionit karstik.

Fenomenet karstike nuk janë të reja për Belshin. Në qershor të këtij viti një gropë tjetër u hap në fshatin Dëshiran, ndërsa në maj të vitit 2022 një rast i ngjashëm u shënua në fshatin Çestije, po ashtu pranë banesave.

Në Dumre, terreni prej rreth 360 km² është i ndjeshëm ndaj shkrirjes së shkëmbinjve të gipsit dhe gëlqeres, çka e bën zonën të predispozuar për rrëshqitje dhe shembje të tokës të këtij lloji.

LEXONI GJITHASHTU:

• Një gropë karstike 7-metra shfaqet pranë banesave në Belsh, banorët të shqetësuar
• Bie në gropën me ujë në pallatin në ndërtim, ndërron jetë 60-vjeçari në Tiranë