Viziton sot Serbinë, Presidenti i Kinës: Miqësi e çeliktë mes vendeve tona

Ditën e sotme Presidenti kinez Xi Jinping pritet të vizitojë Serbinë, ku do të takohet me homologun e tij Aleksandër Vuçiç dhe figura të tjera të rëndësishme

Sipas mediave të huaja, Xi Jinping tha sot se mezi pret të takohet me Vuçiç dhe liderë e miq të tjerë serbë me të cilët do të diskutojë miqësinë, do të planifikojë bashkëpunimin dhe siç thekson ai, do të injektojë gjallëri të re në miqësinë e çeliktë midis Kinës dhe Serbisë.

Ai tha për gazetën “Politika” se si president i Republikës Popullore të Kinës, kjo do të jetë vizita e tij e dytë në Serbi, duke theksuar se skenat miqësore gjatë vizitës së tij të fundit në Beograd tetë vjet më parë, janë ende të gjalla në mendjen e tij.

Po ashtu Xi shtoi se që atëherë bashkëpunimi i ngushtë i të dy palëve ka arritur tashmë rezultate të frytshme.

“Në mes popujve të Kinës dhe Serbisë ka pasur gjithmonë një afrimitet, pavarësisht distancës së madhe mes nesh. Gjatë luftës së ashpër Antifashiste dhe në periudhën e shtetndërtimit të tyre në shekullin e kaluar, popujt e dy vendeve kanë fituar një miqësi e çeliktë që shtrihet në kohë dhe hapësirë. ​Në mes të transformimit të vazhdueshëm të botës, të paprecedentë në një shekull, mbështetja e ndërsjellë e të dy palëve është më e fortë, bashkëpunimi reciprokisht i dobishëm është më i ngushtë, ndërsa shkëmbimet dhe mësimi i ndërsjellë janë më kuptimplotë”, ka thënë Xi.