Vjedhje në teqe dhe tyrbe, 35-vjeçari nga Cërriku arrestohet në Muriqan

Një 35-vjeçar nga Cërriku është arrestuar në pikën kufitare të Muriqanit, i shpallur në kërkim nga Policia e Gramshit për vjedhje në objekte kulti.

35-vjeçari ishte shpallur në kërkim më 27.08.2025 nga Komisariati i Policisë Gramsh, pasi dyshohet të jetë autor i dy rasteve të vjedhjes, ku është vjedhur një shumë prej 70,000 lekësh.

Raste të vjedhjes janë konkretisht: Më datë 20.08.2025, ka vjedhur në tyrben e fshatit Grabovë e Poshtme; më datë 27.08.2025, ka vjedhur në teqenë e fshatit Dushk.

“Shërbimet e Komisariatit të Policisë Gramsh, të mbështetura nga informacionet operative për një shtetas të shpallur në kërkim që do të hynte në territorin e Shqipërisë, dhe si rezultat i bashkëpunimit me policinë kufitare të Muriqanit, u bë e mundur ndalimi i shtetasit në kërkim, S.T., 35 vjeç, banues në Cërrik,” thuhet në njoftimin e policisë.

Vijojnë veprimet hetimore për zbardhjen e vjedhjeve të tjera të mundshme, ku mund të jetë implikuar 35-vjeçari.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme.