Vjen një mesazh tjetër nga lideri suprem i Iranit, edhe pse ende ai nuk është parë në publik

Në mesazhin e fundit që i atribuohet udhëheqësit të tretë suprem të Iranit, Mojtaba Khamenei, thuhet se ai ka falënderuar klerikët dhe popullin irakian për “qëndrimin e tyre të qartë ndaj agresionit ndaj Iranit”.

Sipas mediave iraniane, mesazhi, që i atribuohet Khameneit, i është dorëzuar një zyrtari irakian pas një takimi midis Kryetarit të Asamblesë Supreme Islame të Irakut dhe ambasadorit iranian në Bagdad.

Qysh nga marrja e detyrës në fillim të marsit, janë publikuar disa mesazhe të shkruara që i atribuohen Mojtaba Khameneit. Megjithatë, ai ende nuk është parë publikisht ose në televizionin shtetëror që nga marrja e detyrës.

Udhëheqësi i ndjerë suprem i Iranit, Ali Khamenei, u vra në ditën e parë të sulmeve më 28 shkurt, por ende nuk është varrosur.

Presidenti amerikan, Donald Trump, ka deklaruar se Mojtaba Khamenei është “ose i vdekur ose në gjendje shumë të keqe, sepse askush nuk ka dëgjuar asgjë prej tij”.

Ndërkohë, ambasadori i Iranit në Kombet e Bashkuara në Gjenevë thekson se mungesa e Khameneit në publik është për shkak të “arsyeve të sigurisë”.

Izraeli kishte premtuar ta synonte Mojtaba Khamenein, si para, ashtu edhe pas marrjes së detyrës.

Po ashtu, Departamenti Amerikan i Shtetit ka vendosur një shpërblim prej 10 milionë dollarësh për 10 udhëheqës iranianë, njëri prej të cilëve është udhëheqësi i ri suprem.