Vjosa në ditën e 4 të krizës: Fshati Fitore në rrezik nga kanalizimet e tejngopura

Kriza përgjatë lumit Vjosa ka hyrë në ditën e saj të katërt, ndërsa niveli i ujit vazhdon të mbetet brenda zonës së rrezikut.

Për dy ditë rresht, matjet kanë shënuar luhatje mes 7.8 dhe 8.3 metrash. Sipas autoriteteve thonë se situata mbetet e brishtë, pasi çdo rritje e mëtejshme mund të çojë në daljen e lumit nga shtrati.

Ndërkohë, tensioni është rritur në fshatin Fitore, ku përmbytjet nuk po vijnë drejtpërdrejt nga Vjosa, por nga kanalizimet e tejngopura. Sipas banorëve dhe ekipeve në terren, rrjeti i drenazhimit ka arritur kapacitetin maksimal dhe tashmë nuk përballon më prurjet, duke bërë që uji të rikthehet drejt zonave të banuara.

Strukturat lokale të emergjencës po monitorojnë situatën nga afër, ndërsa pritet që gjatë orëve në vijim të jepen vlerësime të reja mbi dinamikën e nivelit të lumit dhe rrezikun për zonat përreth. Autoritetet u bëjnë apel banorëve të jenë të kujdesshëm dhe të ndjekin njoftimet zyrtare.