Kandidati për kryeministër nga Lidhja Demokratike e Kosovës, Avdullah Hoti, tha të premten gjatë takimit më strukturat e partisë në Lipjan, se ata që e tradhtuan LDK-në, do të marrin atë që meritojnë.
Ky ishte një mesazh për Vosja Osmanin, e cila për zgjedhjet e 14 shkurtit është bashkuar me Lëvizjen Vetëvendosje të Albin Kurtit.
“Njerëzit e LDK-së do të qëndrojnë në LDK dhe në fund të fundit, secili do të marrë atë që e meriton. Edhe një ish-kolege do të marrë atë që meriton, në vend se të ishte në listë me Kujtim Shalën, Arben Gashin e të tjerët, ajo do të jetë në listë me Fitore Pacollin e të tjerët”, tha Hoti.
“Me atë marrëveshjen e djeshme ajo vendosi në ballë logon e VV-së, por votuesi i LDK-së do të qëndrojë në LDK dhe nuk do të shkojnë në listat tjera”, u shpreh ai më tej.
Sipas Hotit në këtë fushatë zgjedhore do të bëhet gara mes të vërtetës dhe propagandës.
“Gara politike do të bëhet mes të vërtetës dhe propagandës, do të jetë garë në mes të mentalitetit qeverisës pro-evropian, qytetar dhe në mes të diktaturës dhe censurimit të fjalës së lirë”, tha kandidati i LDK-së për kryeministër.
Lexoni gjithashtu:
Bashkimi Kurti-Osmani, kreu i PDK-së: S’është koalicion për qytetarët, por për karrige e poste
