Von der Leyen nis vizitën dyditore në Kaukazin Jugor: Duam të ndihmojmë në ndërtimin e të ardhmes

Presidentja e Komisionit Evropian, Ursula von der Leyen, mbërriti të mërkurën në Baku, duke nisur një vizitë dyditore në rajonin e Kaukazit Jugor, e cila do të përfshijë edhe Armeninë.

Sipas agjencisë shtetërore të lajmeve Azertac, von der Leyen mbërriti në Aeroportin Ndërkombëtar “Heydar Aliyev”, ku u prit me ceremoni zyrtare nga ministri i Jashtëm i Azerbajxhanit, Jeyhun Bayramov, Komisionerja Evropiane për Zgjerim, Marta Kos, dhe zyrtarë të tjerë.

Pas mbërritjes, von der Leyen theksoi se Bashkimi Evropian synon të forcojë bashkëpunimin me vendet e rajonit.

“BE-ja beson në një të ardhme të ndritur për Kaukazin Jugor: të lidhur, paqësor dhe të begatë. Ne duam të ndihmojmë në ndërtimin e kësaj të ardhmeje. Unë jam gjithashtu këtu për të thelluar partneritetin BE-Azerbajxhan, nga tregtia te transporti dhe nga energjia te ekonomia”, shkroi ajo në platformën X.

Gjatë qëndrimit në Baku, presidentja e Komisionit Evropian do të zhvillojë një takim me presidentin e Azerbajxhanit, Ilham Aliyev, pas të cilit pritet të mbajnë deklarata për mediat.

Të enjten, von der Leyen do të udhëtojë në Armeni, ku do të takohet me kryeministrin Nikol Pashinyan dhe do të mbajë një konferencë të përbashkët për shtyp. Në të dyja vizitat ajo shoqërohet nga Komisionerja Evropiane për Zgjerim, Marta Kos.