Voskopoja/ Festat e fundvitit, akomodimet e rezervuara prej dy muajsh

Voskopoja pritet të ketë edhe këtë vit turistë të shumtë për festat e fundvitit. Operatorët turistikë bëjnë të ditur se të gjitha hotelet, bujtinat dhe shtëpitë pritëse janë të rezervuara për Krishtlindje dhe Vitin e Ri, madje rezervimet janë bërë që prej dy muajsh.

Një operator turistik i zonës tha:

“Për festat e fundvitit Krishtlindje dhe Vitin e Ri gjithçka është e rezervuar. Të gjitha bujtinat, hotelet dhe shtëpitë pritëse janë plot. Turistët do të shijojnë gatimet tradicionale, ngrohtësinë e njerëzve të mirë dhe atmosferën që krijon bora gjatë fundvitit.”

Ai shtoi se rezervimet kanë nisur prej dy muajsh dhe tani mund të thuhet se janë mbyllur. Turistët vijnë kryesisht nga Shqipëria, me shumicë nga kryeqyteti dhe rrethet e tjera. Akomodimet bosh janë të rralla dhe interesi është shumë i lartë. Përveç ushqimit tradicional dhe produkteve të vendit, vizitorët mund të shijojnë edhe muzikë lokale.

Krahas Voskopojës, rezervime për festat e fundvitit ka edhe në fshatrat turistike të Dardhës, Boboshticës dhe Vithkuqit.