Vota e emigrantëve, gazetari Hoxha: Regjistrimi online, votimi nëpërmjet ‘Face ID’

Gazetari Ardit Hoxha sqaroi në Euronews Albania mënyrën sesi mund të votojnë emigrantët në zgjedhjet e 25 prillit.

Ai theksoi fillimisht se aktualisht në KQZ është një draft, që po diskutohet nga grupet e punës.

“Duhet të sqarojmë që kemi të bëjmë me një draft paraprak që është duke u konsultuar në grupet e punës në KQZ. Pasi të dakordësohet do të kalohet në Komisionin Rregullator në KQZ dhe do të votohet në këtë komision dhe më pas përgatitja për ta vënë në zbatim”, u shpreh ai.

Sipas gazetarit në këtë draft jepen dy variante. Zoti Hoxha shpjegoi se varianti i parë është se qytetarët me dokumente shqiptare dhe me dokumente të rregullta në shtetet ku jetojnë, duhet të regjistrohen në Drejtorinë e Përgjithshme të Gjendjes Civile

“Mënyra e votimit të emigrantëve deri në këtë momente nga ky projektvendim, parashikohen dy variante. Varianti i parë, për të gjithë shtetasit shqiptarë të pajisur me dokumente shqiptare dhe me dokumente të rregullta në shtetet ku jetojnë. Ata të bëjnë regjistrimin në drejtorinë e Përgjithshme të Gjendjes Civile, duke dhënë të dhënat tona”, tha ai.

Ndërsa varianti i dytë është nëpërmjet aplikacionit ‘Face ID’.

“Varianti i dytë, i cili është parashikuar si një mundësi shtesë, për të mos pasur manipulime, është metodë që e ofron teknologjia nëpërmjet ‘Face ID’. Në momentin që emigranti shqiptar bën këtë regjistrimin, përmes një aplikacioni bën një kontroll, përmes fytyrës. Është një kontroll i dyfishtë, që të evitojë çdo mundësi për manipulime. Pra, do të vërtetohet që është vërtet personi që është në kartën e ID dhe në foton që do të bëjë këtë Face ID”, tha gazetari.

Lexoni gjithashtu:

Votimi dhe numërimi elektronik, PD dhe PS propozojnë qarqet e tyre të përzgjedhura

Teknologjia në zgjedhje, KQZ u kërkon partive politike të propozojnë zonat ku do të implementohet votimi elektronik