Vota e emigrantëve, projektvendimi: Regjistrim online dhe verifikim përmes ”Face ID”

Regjistrimi “online” është zgjedhur nga Komisioni Qendror i Zgjedhjeve si mënyra më e sigurt e mundshme për të mundësuar votën e shqiptarëve nga jashtë shtetit.

Në një projektvendim të KQZ-së, janë përcaktuar rregullat që emigrantët do të ndjekin për të dhënë votën për zgjedhjet parlamentare të 25 prillit.

Komisioni pritet të ngre një sistem teknologjik për të regjistruar fillimisht kërkesat e emigrantëve. Por nuk do të mjaftojë vetëm ky regjistrim pasi fillimist do të duhet që ata të kenë deklaruar dhe regjistruar adresën e vendbanimit, siç e përcakton dhe ligji.

Shqiptarët që do të duan të votojnë për zgjedhjet parlamentare, do të plotësojnë të dhënat që do të kërkojë sistemi i KQZ-së, i cili gjithashtu do të bëjë verifikimin e çdo personi nëpërmjet dy mënyrave: përmes të dhënave personale dhe familjare, përmes identifikimit me “Face ID”.

Nëse të dhënat e marra nuk përputhen, atëherë personit në fjalë do t’i hiqet e mundësia e votimit.

KQZ nuk e ka një numër të saktë të shqiptarëve që jetojnë jashtë vendit për shkak se nuk ka një regjistër të tyre.

Ndonëse ky projektvendim pritet të miratohet së shpejti, KQZ është e vetëdijshme se ky proces është i vështirë për t’u realizuar, jo vetëm për shkak të afatit kohor, por edhe sepse Shqipëria nuk e ka ende një kornizë të plotë, që rregullon dhe mundëson të drejtën e votimit, nga jashtë vendit për zgjedhësit me vendbanim jashtë shtetit.