Elbasani do të jetë një nga bashkitë në të cilat procesi i votimit dhe numërimit të votave në zgjedhjet vendore te 14 majit do te zhvillohet në mënyrë elektronike.
Sipas dy kundërshtarëve politik në këtë qark, kryetari i bashkisë që rikandidon sërish Gledian Llatja dhe kandidatit të PD, Bledi Himci, kjo mënyrë nuk lë vend për manipulime.
“Padiskutim që partia demokratike votimin elektronik e ka kërkuar prej shumë e shumë kohësh. Të paktën do evitonte manipulimin e votës në procesin e numërimit,” – tha Himci.
“Absolutisht që është një gjë shumë e mirë, shumë e mirë sepse rezultati del shumë shpejt, ka një besueshmëri, teknologjia ka ecur shumë përpara. Është një teknologji e kolauduar që ka sjellë një besueshmëri për të gjitha palët në të gjitha vendet ju është aplikuar,” – u shpreh Llatja.
Ajo që shihet me dyshim, është përdorimi i teknologjisë nga votuesit që kanë mungesë informacioni në këtë fushë.
“Duhet që nga ana e KQZ-së të kemi sa më shumë spote orientuese për popullatën, sigurisht edhe trajnime nga pjesa e operativëve që do të asistojnë në proxeset e votimit dhe do të jene pranë pajisje. Dëshira jonë është që këta individë të jenë apartiakë,” – u shpreh Himci.
Pritet që rezultati i zgjedhjeve të publikohet 1 orë nga mbyllja e votimit. Implementimi i sistemit elektronik të votimit dhe numërimit të votave për dy bashkitë Elbasan dhe Kamëz i kushtoi shteti shqiptar 7 milion €.
LEXONI GJITHASHTU:
- Zbulohet bashkia që nuk mori miratim për votim elektronik
- Celibashi: Informimi për votimin për Këshillin Bashkiak nuk është detyrë e KQZ