Votimi i qeverisë së re, PD vendos të mos bojkotojë seancën Parlamentare

Grupi parlamentar i Partisë Demokratike është mbledhur të mërkurën në një takim, ku në fokus ishte seanca e së enjtes në Kuvend, në të cilën pritet të miratohet qeveria e re dhe shpaloset programi i saj.

Sipas burimeve, PD nuk do ta bojkotojë këtë seancë, ndërsa në mbledhjen e grupit parlamentar është diskutuar oponenca që do t’i bëhet mazhorancës në Kuvend. Menaxhimi i pandemisë, pasojave të tërmetit si dhe situata e kriminalitetit janë disa nga çështjet që PD pretendon se socialistët kanë dështuar.

Në seancën e së enjtes, Kuvendi pritet të miratojë kabinetin e ri qeveritar pasi ata u dekretuan edhe nga Presidenti Meta. Kryeministri Rama pritet që të shpalosë programin e qeverisjes, i cili bazuar në premtimet gjatë fushatës do të mbështetet në turizëm, bujqësi dhe përfundimin e rindërtimit.