Vrasja e 14-vjeçarit pranë shkollës në Tiranë, reagon Ministria e Arsimit

Ministria e Arsimit ka reaguar lidhur me ngjarjen e rëndë të ndodhur mesditën e kësaj të hëne në Tiranë, ku si pasojë e një sherri me thika pranë shkollës “Fan Noli”, mbeti i vrarë një 14 vjeçar, ndërsa u plagos një tjetër.

“Jemi thellësisht të tronditur nga ngjarja tragjike”,-thuhet në reagim ndërsa shprehen ngushëllimet për 14-vjeçarin e larguar nga jeta dhe për familjen e tij.

Më tej në reagim thuhet se Siguria në shkolla dhe jashtë tyre ka qenë dhe do të mbetet një prioritet absolut, i bashkëpunimit mes Ministrisë së Brendshme, Policisë së Shtetit, Ministrisë së Arsimit, Pushteti Vendor, komunitetit dhe të gjithë shoqërisë.

Gjithashtu Ministria e Arsimit i ka bërë thirrje policisë që kjo ngjarje të zbrdhet sa më shpejtë.

Reagimi i plotë:

Jemi thellësisht të tronditur nga ngjarja tragjike e ndodhur sot në rrugën “Qemal Stafa”, Tiranë, ku një konflikt mes tre të miturve çoi në humbjen e jetës së njërit prej tyre, nxënës i shkollës “Fan Noli”.

Ngushëllimet tona më të sinqerta i shkojnë familjes së nxënësit që humbi jetën, ndërsa urojmë shërim të shpejtë për nxënësin tjetër. Në të njëjtën kohë, kërkojmë nga institucionet ligjzbatuese që të kryejnë zbardhjen e menjëhershme të të gjitha rrethanave të kësaj ngjarjeje.

Siguria në shkolla dhe jashtë tyre ka qenë dhe do të mbetet një prioritet absolut, i bashkëpunimit mes Ministrisë së Brendshme, Policisë së Shtetit, Ministrisë së Arsimit, Pushteti Vendor, komunitetit dhe të gjithë shoqërisë.

Ministria e Arsimit dhe Sportit ka marrë në vazhdimësi, dhe është duke zbatuar masa konkrete për të garantuar që procesi i mësimdhënies, në të gjitha shkollat e Shqipërisë, të kryhet në mënyrë sa më të sigurt, të rregullt e me standarte.

Ndërkohë që Ministria e Arsimit dhe Sportit është maksimalisht e angazhuar për të siguruar mjedise sa më të sigurta për zhvillimin normal të mësimit në të gjithë Shqipërinë, mbetet gjithmonë thelbësor roli sa më aktiv i të gjitha palëve, prindër, mësues, punonjës të policisë së shtetit, institucione arsimore por edhe komuniteti, për të bërë të mundur parandalimin e ngjarjeve të tilla në të ardhmen.

LEXONI GJITHASHTU:

• Vrasja e 14-vjeçarit në Tiranë, dyshohet për tre autorë. Zbulohen detajet e reja
• Sherr me thika mes adoleshentëve pranë shkollës 9-vjeçare në Tiranë