Vrasja e Floyd, protesta në Londër. Manifestuesit: Racizmi, problem edhe tek ne

Protestues që bërtisnin “pa drejtësi nuk ka paqe” dhe “jo policisë raciste” u mblodhën të mërkurën në qendër të Londrës për të protestuar për vdekjen e George Floyd në Mineapolis.

Shumë prej protestuesve ngrinin parulla të tipit “Britania nuk është e pafajshme” dhe “racizmi është një problem global”.

Manifestuesit thërrisnin emrin e George Floyd dhe “Jetët e njerëzve me ngjyrë kanë rëndësi”, duke iu drejtuar presidentit Donald Trump dhe kryeministrit Boris Johnson.

Nga ana e tij Johnson reagoi duke deklaruar se jetët e njerëzve me ngjyrë kanë rëndësi dhe se mbështeste protestat e ligjshme, ku respektohet distancomi social.

“Sigurisht që jeta e njerëzve me ngjyrë ka rëndësi dhe unë e kuptoj shumë mirë zemërimin që ndihet jo vetëm në Amerikë por në të gjithë botën, përfshirë vendin tonë”, deklaroi Johnson.

Nga ana tjetër, krerët e policisë britanike u shprehën të tronditur nga mënyra se si Floyd humbi jetën dhe nga dhuna që pasoi në qytetet amerikane, ndërsa ftuan protestuesit britanikë për qetësi.

Por manifestuesit deklaruan se në Mbretërinë e Bashkuar racizmi mbetet një problem i theksuar gjithashtu.