Vrasja e gjyqtarit Kalaja, flamuri në gjysmë shtizë në Gjykatën e Apelit të Tiranës

Në Gjykatën e Apelit flamuri është ulur në gjysmështizë të martën një ditë pas vrasjes tragjike të gjyqtarit shkodran Astrit Kalaja në sallën e gjyqit teksa kryente detyrën.

Ngjarja e rëndë tronditi opinionin publik dhe solli reagime të shumta nga sistemi i drejtësisë, politika por edhe publiku.

Elvis Shkambi qëlloi me tre plumba gjyqtarin Astrit Kalaja menjëherë sapo dha vendimin në disfavor të tij për një çështje prone duke i shkaktuar vdekje.

31-vjeçari qëlloi me armë zjarri edhe ndaj 2 personave të tjerë në sallën e gjyqit, me të cilët ishte në konflikt pronësie duke i lënë të plagosur.

Pas arrestimit të autorit të dyshuar të vrasjes, Elvis Shkambi, në pranga lidhur me ngjarjen e rëndë janë vënë edhe xhaxhai i tij, Gjon Shkambi, si dhe punonjësi i sigurisë i Gjykatës së Apelit Tiranë, Banush Koxhaj.