Vrasja e Pjerin Xhuvanit, Policia nis përgatitjet për rindërtimin e skenës së krimit

Ka nisur rindërtimi i skenës së krimit për ngjarjen e vitit 2021 në Elbasan, disa ditë para zgjedhjeve, ku mbeti i vrarë Pjerin Xhuvani.

Rindërtimi i skenës së krimit ka nisur me kërkesë të Gjykatës së Apelit në Elbasan.

Gjykata u kërkoi eksperëve rindërtimin e skenës në vendin e ngjarjes, ndërsa këta të fundit kërkuan angazhim maksimal të Policisë së Elbasanit, për të bërë të mundur rindërtimin e skenës së krimit.

Këtë mbrëmje Policia ka nisur vendosjen e shiritave rrethues dhe ndalimin e parkimit për t’i lënë ekspertëve hapësirë të punojnë.

Gjykata ka caktuar tre ekspertë, njëri prej tyre ekspert balistik dhe i vendngjarjeve në Policinë e Shtetit.

Eksperimenti hetimor vjen pas kërkesave të të akuzuarit për vrasjen e Pjerin Xhuvanit, Arbër Paplekaj, i cili kërkoi të caktohet këndi i qitjes jo vetëm prej tij por edhe dy persona të tjerë që nuk janë identifikuar ende pas kësaj ngjarjeje.

Kjo do të jetë hera e dytë që rindërtohet ngjarja. Më herët, Prokuroria e Elbasanit rindërtoi ngjarjen në korrik të vitit 2022.

Skena e krimit pritet të rindërtohet ditën e nesërme në orën 10:00, ndërsa sot Policia po merr vetëm masat për bllokimin e zonës për automjetet.

Tre ekspertët që do të rindërtojnë skenën e krimit janë Arjan Hanko, pranë Institutit të Policisë Shkencore, Artan Rexhepi dhe Shpëtim Buda, ekspertë të pavarur.

Ekspertët duhet të përcaktojnë drejtimin e qitjes së armëve ditën e ngjarjes.

LEXONI GJITHASHTU:

• Akuzohet për vrasjen e Pjerin Xhuvanit, mbahet seanca për Arbër Paplekajn (Detajet)
• EMRAT| Kush janë ekspertët që do të rindërtojnë skenën e vrasjes së Pjerin Xhuvanit