Policia e Shkodrës ka arrestuar 21-vjeçarin në kërkim, Luçian Mhilli, i cili akuzohet për vrasjen e Valter Fejzës në shtator të vitit 2023.

Ndaj Luçian Mhillit, Gjykata e Shkodrës kishte caktuar masën e sigurisë “Arrest në burg”, për veprat penale “Vrasja me dashje”, “Mbajtje pa leje dhe prodhimi i armëve, armëve shpërthyese dhe municionit” dhe “Prodhimi dhe shitja e narkotikëve”, kryer në bashkëpunim.

21-vjeçari akuzohet se në bashkëpunim me 2 vëllezërit e tij, Aleksandër Mhilli dhe Paolo Mhilli, të vënë në pranga nga Policia, ka vrarë 33-vjeçarin Valter Fjerza.

Në lidhje me këtë rast, policia ka vënë në pranga dhe shtetasin Enton Dushaj për veprat penale “Përkrahja e autorit të krimit”, “Moskallëzimi i krimit” dhe “Prodhimi dhe shitja e narkotikëve”.

Pas ngjarjes, nga kontrollet në lokalin në afërsi të vendit ku u krye vrasja, policia gjeti dhe sekuestroi një sasi lënde narkotike kanabis sativa, në trajtë boçeje, që dyshohet se posedohej nga 5 shtetasit.

Fjerza, u vra, më 21 shtator, në fshatin Hot i Ri të Shkodrës, vetëm pak metra larg banesës së tij. Ai po shkonte me makinë drejt lokalit të fshatit, pasi kishte marrë vesh se vëllai i tij, Kol Fjerza, po konfliktohej me pesë djem të fisit Mhilli.

Sherri mes vëllait të viktimës, Kol Fjerzës dhe Klodian Mhillit, kishte nisur për shkak të një vendi parkimi në rrugicën e lagjes. 24-vjeçari Mhilli pretendonte se Fjerza i kishte bllokuar hyrjen për në banesë.

Sherri banal përfundoi në vrasjen e 33-vjeçarit nga 4 personat e ndaluar nga policia.

LEXONI GJITHASHTU:

• Vrasja e Egli Progës në Pogradec, ekspertiza: Vdiq si pasojë e hemorragjisë në tru
• “Vëllain tim e vranë 4 kriminelë”, motra e Egli Progës mbytet në lot gjatë fjalimit