“Vëllain tim e vranë 4 kriminelë”, motra e Egli Progës mbytet në lot gjatë fjalimit

Jonida Proga motra e të ndjerit Egli Proga i cili u rrah për vdekje 9 ditë më parë në Pogradec tha në protestën e mbajtur në homazh të tij këtë të hënë në Tiranë, se kjo ngjarje nuk mund të kalojë si ngjarje statistikore.

Ajo tha se ngjarja është munduar të manipulohet e se Denis Meçe nuk është autori i vetëm që ka shkaktuar vdekjen e vëllait të saj.

“Ishte 10 gusht, një ditë e shtunë, ku si në këtë orë im vëlla Egli ishte i vdekur në spitalin e Pogradecit pa asnjë shenjë jete. Ai vdiq në rrugë në mes të Pogradecit, vdiq i rrahur i goditur në kokë, në trup, në testikuj nga banditët e qytetit tim. Jo nga një po nga katër banditë. Janë katër jo një individ. Prokuroria, Gjykata, policia duhet ta dëgjojnë mirë, Egli u vra nga katër kriminel. Unë jam juriste nuk mund të akuzojë pabazë.

Ndaj kërkova llogari te prokurorja dhe i thash “Ik nuk do e bësh drejtësinë e tim vëllai” ai u lëndua nga 4 barbarë me emra e mbiemra, njëri u dorëzua ndërsa barbarët e tjerë kanë 9 ditë që pinë raki. A e dini që horri që ka marrë përsipër vrasjen është organizuar që ta marrë përsipër vrasjen që të shpëtojnë të tjerët.