Vritet kreu i bandës brenda gjykatës në Sri Lanka, autori u maskua si avokat

Një udhëheqës bande është qëlluar për vdekje brenda një gjykate në kryeqytetin Colombo, Sri Lanka, nga një person i armatosur i maskuar si avokat. Sipas policisë, arma ishte futur në gjykatë e fshehur brenda një libri të zbrazur nga një grua e dyshuar, e cila ndodhet ende në arrati.

Viktima, Sanjeewa Kumara Samararathne, i njohur si Ganemulle Sanjeewa, ishte në paraburgim që nga shtatori 2023 dhe po përballej me akuza për disa vrasje. Ai u dërgua me urgjencë në spital pasi u qëllua, por u shpall i vdekur pas mbërritjes.

Personi i armatosur arriti të largohej nga vendi i ngjarjes, por më pas u arrestua nga policia. Sipas autoriteteve, ai kishte përdorur disa identitete të rreme. Ndërkohë, policia ka identifikuar të dyshuarën që kontrabandoi armën si 25-vjeçaren Pinpura Dewage Ishara Sewwandi dhe ka ofruar shpërblim për këdo që ofron informacion për vendndodhjen e saj.

Dy persona të tjerë, përfshirë një oficer policie dhe një shofer furgoni, janë arrestuar me dyshimin se kanë ndihmuar të dyshuarit në organizimin e atentatit.

Ngjarja ka ngritur shqetësime të mëdha për sigurinë në gjykata dhe ka nxitur diskutime të ashpra në parlament për rritjen e masave kundër dhunës së bandave. Ministrja e Shëndetësisë dhe Masmedias, Nalinda Jayatissa, deklaroi se qeveria është e vendosur të godasë krimin e organizuar dhe aktivitetet e bandave.

Pas të shtënave, autoritetet kanë forcuar masat e sigurisë në gjykata, duke vendosur roje të armatosura gjatë transportit të të burgosurve. Sipas raportimeve, të paktën nëntë persona kanë humbur jetën këtë vit si pasojë e përplasjeve mes bandave rivale në Sri Lanka.

LEXONI GJITHASHTU:

• Punëtorët nga Sri Lanka zgjedhin Shqipërinë: Janë pagat e larta dhe kushtet e mira
• Sulm me thikë në Austri: Vritet një 14-vjeçar, plagosen pesë persona