Sulm me thikë në Austri: Vritet një 14-vjeçar, plagosen pesë persona

Një sulm me thikë në qytetin Villach, pranë kufirit me Italinë dhe Slloveninë, ka lënë të vdekur një 14-vjeçar dhe ka plagosur pesë persona të tjerë. Dy nga të plagosurit janë në gjendje të rëndë.

Policia arrestoi në vendngjarje të dyshuarin, një 23-vjeçar sirian, azilkërkues me leje qëndrimi të përkohshme. Deri më tani, motivi i sulmit mbetet i paqartë, por autoritetet kanë përfshirë specialistë të ekstremizmit në hetim.

Incidenti ndodhi të shtunën rreth orës 16:00 me orën lokale. Një punonjës i dërgesave, gjithashtu me origjinë siriane, ndihmoi në ndalimin e sulmuesit duke e përplasur me makinën e tij. Policia e arrestoi menjëherë agresorin, i cili ishte ende duke u marrë në pyetje deri në mbrëmje.

Fillimisht u raportua për një sulmues të dytë, duke çuar në mbylljen e përkohshme të transportit hekurudhor, por policia konfirmoi se bëhej fjalë për vetëm një autor.

Ngjarja ka ndezur debatet politike në Austri mbi politikat e azilit. Kreu i ekstremit të djathtë, Herbet Kickl, kërkoi masa më të ashpra për azilkërkuesit, ndërsa guvernatori rajonal Peter Kaiser dënoi aktin, por paralajmëroi kundër përhapjes së urrejtjes. Sulmi vjen në një moment të tensionuar politik, me vendin ende në pasiguri për formimin e qeverisë pas zgjedhjeve të fundit.

LEXONI GJITHASHTU:

• Përleshje me armë mes disa personave në Çair të Shkupit, vritet 35-vjeçari shqiptar
• Shpërthimi në Moskë, vritet themeluesi i një batalioni që luftonte në Ukrainë