Vritet një militant i IS-it që po planifikonte sulme në Evropë dhe SHBA

Koalicioni i udhëhequr nga SHBA-të tha se trupat e tij vranë një militant kryesor të grupit ekstremist Shteti Islamik në Siri, të enjten.

Agjencia irakiane kundër terrorizmit e ka identifikuar atë si Omar Abdul-Qader, i njohur edhe me nofkën e tij të luftës Abdul-Rahman al-Halabi.

Observatori Sirian për të Drejtat e Njeriut, një organizatë monitoruese e luftës, raportoi se Abdul-Qader u vra gjatë një operacioni të kryer nga koalicioni i udhëhequr nga SHBA-të në provincën siriane të Hama-s, dhe se ai ishte përgjegjës për planifikimin e sulmeve në Evropë dhe SHBA.

Komanda Qendrore e Ushtrisë Amerikane tha se Abdul-Qader ishte “një operativ që përbënte një kërcënim të drejtpërdrejtë për Shtetet e Bashkuara” dhe se asnjë nga sulmet që ai kishte planifikuar nuk u krye.

Agjencia kundër terrorizmit e Irakut tha se ai ishte kreu i operacioneve të jashtme të ISIS-it. Po ashtu, ai ishte i përfshirë në bombardimin e Ambasadës Iraniane në Bejrut në vitin 2013, ku mbetën të vrarë më shumë se 20 persona. Atasheu kulturor i Iranit ishte ndër viktimat, sipas agjencisë.

“Ne nuk do të ndalemi në ndjekjen e terroristëve që synojnë të sulmojnë Shtetet e Bashkuara, forcat tona ose aleatët dhe partnerët tanë jashtë vendit,” tha komandanti i Komandës Qendrore të SHBA-së, Admirali Brad Cooper.

Kreu i Observatorit Sirian për të Drejtat e Njeriut, Rami Abdurrahman, deklaroi se Abdul-Qader, një shtetas sirian, ishte arrestuar në Liban dhe më pas i ishte dorëzuar autoriteteve të Damaskut, kur në pushtet ishte presidenti sirian Bashar al-Assad. Pas rrëzimit të Assad-it nga pushteti në dhjetor të vitit të kaluar, Abdul-Qader u arratis nga burgu dhe që atëherë kishte qenë në arrati.

ISIS dikur kontrollonte pjesë të mëdha të Sirisë dhe Irakut, ku në vitin 2014 shpalli një kalifat. Grupi ishte i njohur për aktet brutale në këto dy vende, si edhe për planifikimin e sulmeve vdekjeprurëse në Lindjen e Mesme dhe në pjesë të tjera të botës.

Ekstremistët u mundën në Irak në vitin 2017 dhe në Siri në 2019, por grupi ende ka grupe aktive që veprojnë në mënyrë të fshehtë.

LEXONI GJITHASHTU:

• Kallas: Shkelja e hapësirës ajrore të Estonisë rusët, provokim i rrezikshëm
• Tre avionë rusë hynë në Estoni, forcat ajrore italiane i zmbrapsën