Vuan nga epilepsia dhe kanceri, 58-vjeçarja pa asnjë ndihmë nga shteti

Mirën, e hasëm në korridoret e Spitalit të Durrësit. Një spital që ajo e njeh mirë, pasi gjatë 16 viteve të fundit është përballur me disa sëmundje, përfshirë epilepsinë dhe kancerin që i preku disa organe.

“Kam filluar që 50 vjeçe me operacione”, tregon ajo.

Për epilepsinë përfitoi një vit pension invaliditeti, i njohur ndryshe si kemp, por që iu ndërpre pak muaj më parë.

“Më thonë që nuk përfitojë. Kam marrë vetëm 1 vit nga 16 që vuaja nga epilepsia”, shprehet 58-vjeccarja.

Tashmë kempin synon ta marrë për paaftësinë për të punuar prej kancerit të gjirit

“Nuk kam më këmbë të gjëmoj”, shprehet ajo gjatë një bisede mjeken.

Në familjen e Mirës, i vetmi burim të ardhurash është pensioni i bashkëshortit. Ajo prej vitesh nuk ka punuar si pasojë e sëmundjeve.

58-vjeccarja thotë se i trembet më shumë përplasjeve pafund në dyert e institucioneve për të përfituar një pension që pretendon se takon me ligj.

“Jam e mbytur në borxhe, nuk di nga të përplasem”, thotë ajo.

Por edhe për kancerin e gjirit kempi është i përkohshëm, ç’ka nënkupton se zonja do të përballet nëpër ato dyer deri në mbushjen e moshës për të përfituar pensionin e pleqësisë.

Mbi 140 mijë persona trajtohen me pension invaliditeti në Shqipëri, i njohur ndryshe si kemp. Ata që janë sëmurë gjatë kohës që kanë qenë në marrëdhënie pune, të paktën gjatë 5 viteve të fundit, e përfitojnë nga Instituti i Sigurimeve Shoqërore. Pensioni mesatar llogaritet të jetë rreth 14 mijë lekë në muaj.

Ndërsa ata që sëmundjen e kanë të lindur ose nuk kanë qenë në marrëdhënie punësh më shumë se 5 vitet e fundit e përfitojnë nga shërbimi social shtetëror. Kjo është skena e re e ndjekur nga shërbimi social në Tiranë, Durrës dhe Elbasan, që do të ndiqet më pas në të gjithë vendin.

Në të 2 institucionet para paraqitjes në komisionin e kempit, qytetari duhet të ketë një dokumentacion të plotë mjekësor dhe vërtetim të kontributeve.

Pensionet kanë një disnivel midis fshatit dhe qytetit. Për sëmundjet e përhershme vlerësimi mund të bëhet një herë të vetme apo çdo 5 vjet. Për sëmundjet që mund të shërohen ose përkeqësohen letrat e kempit duhet ët plotësohen çdo 1, 2 ose 3 vite.