Vuçeviç zotohet se do të kërkojë garanci të dokumentuara për projektin e litiumit

Kryeministri i Serbisë, Millosh Vuçeviç, ka thënë më 10 shtator se askush nuk do ta marrë si të garantuar fjalën e kompanisë Rio Tinto, dhe që shteti do të sigurojë garanci të dokumentuara para nisjes së punës për mihje të minierës më të madhe të litiumit në Evropë.

Komentet e Vuçeviqit vijnë pas një takimi të zhvilluar në fundjavë mes qytetarëve, përfaqësuesve të Rio Tintos dhe presidentit serb, Aleksandar Vuçiç, i cili është një prej zyrtarëve që mbështet më së shumti projektin Jadar.

Memorandumi i mirëkuptimit mes Rio Tintos dhe Qeverisë së Serbisë për këtë projekt është nënshkruar më 2017.

Vuçeviq, i cili është bërë kryeministër në fillim të majit, ka thënë se shteti serb nuk do të lejojë mihje të minierës së litiumit pa garanci për mbrojtje të ujit dhe shëndetit publik.

“Në tri ose katër orët e para, njerëzit kanë bërë pyetje”, ka thënë Vuçeviq për takimin e fundjavës.

“Për herë të parë kemi dëgjuar përgjigjet e Rio Tintos. Jemi përballur me argumente. Situata është shumë më e qartë dhe më e mirë kur ka komunikim”.

Vuçeviq ka thënë se publiku serb ende nuk i ka përgjigjet për shumë pyetje.

“Nëse ne ruajmë natyrën dhe njerëzit, vetëm atëherë mund të mendojmë për përfitimet ekonomike”, ka thënë ai.

LEXONI GJITHASHTU:

• Vuçeviç-ambasadorit britanik: E nevojshme t’i bëhet presion Prishtinës
• Vuçeviç: Shpërfillja, përgjigja më e mirë për organizatorët e “Mirëdita, dobar dan”