Vurmo: Ndarja nga RMV nuk është zgjidhje për procesin e integrimit

Drejtuesi i Insitutit për Demokraci dhe Ndërmjetësim Gjergji Vurmo thotë se ndarja e Shqipërisë nga Maqedonia e Veriut në procesin e hapjes së negociatave me Bashkimin Europian, nuk është zgjidhja e duhur.

Për emisionin “Mirëmëngjes” në “Euronews Albania”, Vurmo u shpreh se duhet rishikuar procesi i integrimit për ta bërë atë sa më demokratizues.

“Ka një artikulim të shtuar të kryeministrit për të kërkuar ndarjen nga Maqedonia e Veriut. Nuk është zgjidhje. E para nuk varet nga Rama dhe as nga kryeministri maqedonas. Kjo varet nga Bashkimi Europian. Mendoj se ajo që do na ndihmonte ne, Maqedoninë e Veriut dhe të gjitha vendet e rajonit nuk do të ishte ndarja apo bashkimi, por rishikimi i procesit të integrimit për ta bërë zhvillimor dhe demokratizues”, tha Vurmo.

Kryeministri Edi Rama ka deklaruar se nëse Bullgaria nuk i heq veton Maqedonisë së Veriut, Shqipëria do të ndryshojë qasje dhe do të kërkojë ndarjen në procesin e negociatave.

Ndërsa, komisionieri për Zgjerim në Bashkimin Europian Oliver Varhyeli do të vizitojë Tiranën më 28 prill.

LEXONI GJITHASHTU

• Do kërkojmë ndarjen nga RMV nëse Bullgaria s’i heq veton, thotë Rama