Presidenti kinez Xi Jinping ndodhet në Moskë për një vizitë dyditore, e para që nga nisja e pushtimit rus të Ukrainës në vitin 2022.
Ai është takuar me presidentin rus Vladimir Putin, me të cilin ka diskutuar për planin kinez të paqes në Ukrainë, si dhe për partneritetin gjithëpërfshirës dhe bashkëpunimin strategjik. Takimi në fjalë ka qenë informal, ndërkohë që ai zyrtar do të zhvillohet të martën dhe do të pasohet nga një konferencë shtypi.
Në momentin e mbërritjes në kryeqytetin rus, i pritur me tapet të kuq, Xi vlerësoi marrëdhëniet miqësore mes Kinës dhe Rusisë.
“Jam besimplotë se vizita do të jetë e frytshme dhe do t’i japë një hov të ri zhvillimit të shëndetshëm dhe të qëndrueshëm të marrëdhënieve ruso-kineze”, deklaroi Xi, i cituar nga agjencia e lajmeve “AFP”.
Ndërsa Putin, nga ana e tij, në një takim me zyrtarë të qeverisë ruse do të deklaronte se marrëdhëniet dypalëshe kishin arritur një nivel të paprecedent mirëbesimi.
Vizita po zhvillohet pak ditë pasi Gjykata Ndërkombëtare Penale lëshoi një urdhër-arrest për presidentin Putin, për krime luftë dhe për rrëmbimin e fëmijëve ukrainas.
Muajin e kaluar, Pekini ofroi një seri propozimesh për dhënien fund të konfliktit, ndaj të cilave Perëndimi reagoi në mënyrë të moderuar.
Shtetet e Bashkuara dhe Bashkimi Evropian më herët i kanë bërë thirrje Kinës që të mos furnizojë Rusinë me armë, pretendim ky që është hedhur poshtë nga vendi aziatik.
LEXONI GJITHASHTU:
- Xi Jinping planifikon të flasë me Zelensky për herë të parë që nga fillimi i luftës
- Putin vizitë surprizë në Mariupolin e shkatërruar nga lufta