Yjet e teknologjisë dhe inovacionit/ Hakathoni i superideve kreative

U zhvillua në datat 10, 12 dhe 13 shkurt hakathoni  “Sfida” në kuadër të programit “Skills Upload Junior”, një nismë e Grupit të Fondacioneve Vodafone. Qëllimi i këtij hakathoni është inkurajimi i të rinjve të moshave 12-18 vjeç që të zhvillojnë ide për t’iu dhënë zgjidhje problemeve sociale me të cilët përballen ata sot, nëpërmjet inovacionit dhe teknologjisë.

Ky projekt, një bashkëpunim midis Fondacionit Vodafone, me programin “Skills Upload Junior”, dhe British Council, me projektin “Alternative Pathways”, u zbatua në tre qendra kryesore të veriut të Shqipërisë: Dibër (Peshkopi, Mat, Bulqizë, Klos), Kukës (Has, Tropojë) dhe Zonën e Malësisë së Madhe (Koplik, Gruemirë, Kastrat). 215 fëmijë nga këto qytete të moshave 12-18 vjeç dhe 86 mësues nga 47 shkolla 9-vjeçare e të mesme po përfitojnë që prej një viti trajnim në disiplinën e kodimit, microbite-t, hardwine-t dhe STEM-it.

“Together we can” (Së bashku ne mundemi) do të thotë që njerëzimi dhe teknologjia duhet të bëhen bashkë. Prandaj sot jemi bërë bashkë emra shumë të fuqishëm si: Fondacioni Vodafone, British Council dhe Ambasada Britanike. Fëmijët e zonave të Veriut, jugut, verilindjes – kanë të njëjtat mundësi për të ndjekur ritmin e zhvillimit të shoqërisë dhe shfrytëzimin e mundësive të pafundme që të ofron  teknologjia.

Aty ku nuk shkon rruga, mjeku, nxënësit, shkolla, mund të shkojë teknologjia dhe çdokush mund të marrë shërbime si shkollimi, mjekësia dhe plot shërbime të tjera publike përmes teknologjisë brenda pak sekondash”, u shpreh Jonida Lakuriqi, Drejtoreshë e Çështjeve Ligjore, Politikave Publike dhe Çështjeve të Jashtme në Vodafone Albania, njëkohësisht Kryetare e Bordit të Fondacionit Vodafone në Shqipëri, e cila ishte shumë entuziaste për projektet dhe idetë inovative të të rinjve.

 Pjesëmarrësit paraqitën problematikat me të cilat përballen çdo ditë, duke filluar që nga proceset manuale të fermave e deri tek shqetësimet që përballen fshatrat dhe qytetet e tyre nga ndryshimet klimatike dhe zhvillimi me ritme jashtëzakonisht të shpejta. Idetë fituese emocionuan të gjithë pjesëmarrësit me frymën e bashkëpunimit që përcollën, dashurinë për natyrën dhe ndërgjegjen e lartë sociale të cilave u kishin dhënë zgjidhje inovatore, shumë praktike, që janë lehtësisht të realizueshme.

 Peshkopia hapi siparin e hakathonit që vijoi me dy evente të tjera në qytetet e Kukësit dhe Malësisë së Madhe. Eventi përmbyllës do të bëhet në Tiranë dhe shkolla fituese do të përfaqësojë Shqipërinë në datën 17-18 mars në Foundation European Showcase, në Bukuresht, mes 8 shkollave fituese te vendeve europiane duke i ofruar kështu një eksperience unike shkëmbimi idesh dhe praktikash, së bashku me fituesit nga 8 shkolla të vendeve europiane.

Projekti “Skills Upload Junior Challenge”, është zbatuar që nga viti 2021 në 8 vende të Europës dhe në të janë përfshirë rreth 7,5 milionë nxënës dhe 600 mijë mësues, të cilët kanë përfituar drejtpërdrejtë nga programi si dhe 8.2 milionë njerëz, familjarë, të afërm të këtyre nxënësve dhe mësuesve.

LEXONI GJITHASHTU:

• Vodafone sjell “5G HoloShow” në TEG, një dimension i ri argëtimi
• Vodafone dhe Intelsat zgjerojnë shërbimet satelitore për sektorin privat dhe publik