Zbardhet kallëzimi ndaj bashkëshortit të Xhaçkës, u deponua në SPAK nga Fredi Beleri

Artan Gaçi bashkëshorti i ish-ministres Olta Xhaçka është paraqitur këtë të premte në SPAK. Gazetari i Euronews Albania Eni Ferhati tha se paraqitja e Artan Gaçit në SPAK  vjen pasi ky i fundit është kallëzuar nga Fredi Beleri.

Ky i fundit e akuzon Gaçin për falsifikim dokumentesh dhe pastrim të produkteve të veprës penale të kryer në bashkëpunim.

Fredi Beleri ka kallëzuar gjithashtu për shpërdorim detyre edhe ish-ministren e punëve të jashmt olta Xhaçkën si edhe ish-kryebashkiakun e Himarës Jorgo Goron.

“Në kallëzimin e zotit Beleri, Artan Gaçi akuzohet për dy vepra penale, për falsifikim dokumentesh dhe pastrim të produkteve të veprës penale të kryer në bashkëpunim. Në këtë kallëzim Fredi Beleri ka kallëzuar edhe Olta Xhaçkën e cila në atë kohë mbante detyrën e Ministres së Punëve të Jashtme, me akuzën për shpërdorim detyre.

Bashkë me çiftin në fjalë Fredi Beleri ka kallëzuar edhe Jorgo Goron për shpërdorim detyre. Sipas kallëzimit të zotit Beleri, Bashkia e Himarës në bashkëpunim me Olta Xhaçkën dhe me bashkëshortin  e saj Artan Gaçin kanë falsifikuar disa dokumente lidhur me një sipërfaqe toke në territorin e kësaj bashkie ku sipas zotit Beleri ish-ministrja e Punëve të Jashtme nëpërmjet regjimit martesor dhe të drejtave pasurore ka pasur përfitime të paligjshme.

Bëhet fjalë edhe për historinë ku zoti Gaçi është shpallur si investitor strategjik nga qeveria, e cila ka përfshirë politikën disa muaj më parë dhe pati edhe një iniciativë në gjykatën kushtetuese”,-tha Eni Ferhati.

LEXONI GJITHASHTU:

• Arrestohet 31-vjeçari serb në Morinë, i shpallur në kërkim nga Interpol
• Çështja e Kosovës diskutohet në samitin e Grandas, presion për masa ndaj Serbisë