Zbardhet vrasja në Shkodër, dyshohet për tre autorë, identifikohet njëri prej tyre

Burime nga policia bënë me dije për Euronews Albania se një nga tre autorët e dyshuar për vrasjen që ndodhi sot në Shkodër është Duel Mehmedaj.

Policia tha se ka mundur të dokumentojë ngjarjen e rëndë që u regjistrua rreth orës 11:20 në fshatin Mushan të njësisë administrative Dajç në Shkodër, ku mbeti i vrarë Ridvan Hyseni (46 vjeç).

Vrasja thuhet se ndodhi “për motive të dobëta” pranë një pike karburanti ndërsa trupi i Hysenit u gjet brenda një makine.

Edhe pse në zonë ka pasur kamera sigurie, burime të policisë thanë se ato nuk kanë funksionuar në momentin e ngjarjes dhe nuk është regjistruar asgjë.

Autorët e dyshuar, të cilët mendohet të kenë qenë së paku tre persona, gjatë paradites ishin konfliktuar me djalin e Ridvanit dhe më pas dyshohet se ky ka ndërhyrë për të sqaruar situatën dhe për pasojë ka mbetur i vrarë me armë zjarri.

Viktima, Ridvan Hyseni ishte person me precedentë penalë dhe dyshohet të jetë autor i disa ngjarjeve të rënda të ndodhura që prej viteve 2008-2009 në Shkodër.

Policia, e mbështetur edhe nga Forcat e Ndërhyrjes së Shpejtë (FNSH) dhe Reparti i Eliminimit dhe Neutralizimit të Elementëve të Armatosur (RENEA), kanë ushtruar kontrolle të shumta gjatë gjithë ditës së shtunë për të gjetur vendndodhjen e autorëve, ndërkohë që pjesë e operacionit është bërë edhe policia e Lezhës, e cila ka vendosur post-blloqe në disa rrugë kryesore hyrëse-dalëse nga Shkodra.

Lexoni gjithashtu:

Ekzekutimi në Shkodër l Policia identifikon autorët e dyshuar, zbulohet motivi