Zbulohet një dhomë tjetër torturash në Ukrainë

Një dhomë tjetër torture, të cilën rusët e kishin ngritur në një bodrum, u zbulua nga policia ukrainase në fshatin Pisky-Radkivskyi në Kharkiv.

“Një dhomë tjetër torturash e pushtuesve rusë. Kur ushtarët rusë hynë në fshat, ata i dëbuan vendasit nga shtëpitë e tyre dhe u vendosën vetë atje”, thuhet në mesazhin e Policisë së Ukrainës në rrjetet sociale.

Në dhomën e torturës, pushtuesit i mbanin banorët vendas në kushte çnjerëzore. Aty banorët u frikësuan, u rrahën dhe u keqtrajtuan. Forcat ruse kishin ngritur dhe 10 dhoma torturash në Izium, shkruajnë mediat greke. 

Izium së fundmi u bë i njohur në të gjithë botën pasi u gjet një varr masiv që përmbante qindra viktima të lëna pas nga pushtimi rus.

Izium i vendosur në rajonin e Kharkivit u pushtua nga pala ruse në muajt e parë të luftës.

Megjithatë, më 10 shtator, pas kundërsulmit të suksesshëm të Ukrainës, ai kaloi përsëri në duart e ukrainasve.

Tërheqja ruse i mundësoi palës ukrainase të publikonte provat që tregonin se civilët ishin torturuar.

LEXONI GJITHASHTU: 

• Lufta në Ukrainë/A mund të përdorë Rusia armë bërthamore taktike?
• Putin: Dëshiroj që lufta në Ukrainë të përfundojë sa më shpejt të jetë e mundur