Zëdhënësi i presidencës: Janë keqpërdorur të dhënat e Metës, kërkojmë hetim ndërkombëtar

Këshilltari i Presidentit të Republikës për media, Tedi Blushi, pretendon se disa persona, të cilët sipas tij janë identifikuar tashmë kanë keqpërdorur të dhënat telefonike të z. Meta, dhe më pas kanë dërguar mesazhe me “përmbajtje fyese” tek qytetarët.

“ Në emër të Presidentit të Republikës, Ilir Meta dënoj me forcë konsumimin e veprës penale të keqpërdorimit të mesazheve telefonike, gjoja në emër të Kryetarit të Shtetit, nga disa persona të identifikuar, që sipas të dhënave të siguruara, kanë dërguar këto ditë mesazhe me përmbajtje fyese dhe kërcënuese në adresë të disa qytetarëve”, thuhet në deklaratën e bërë për media.

Presidenca në reagimin e saj thotë se keqpërdorimi i numrit të z. Meta përbën një skandal dhe për këtë do të kërkohet hetim i menjëhershëm ndërkombëtar.

“Për këtë skandal kriminal të keqpërdorimit të numrit të Presidentit të Republikës do kërkohet hetim i menjëhershëm edhe ndërkombëtar, pasi nëse institucionet tona do të ishin funksionale askush nuk do të guxonte të bënte akte të tilla të çmendura dhe të dënueshme ligjërisht, që mund të venë në rrezik serioz edhe sigurinë kombëtare të Republikës së Shqipërisë, vend anëtar i NATO-s”, sqaroi presidenca.