Zelensky nënshkruan një marrëveshje me Macron për 100 avionë luftarakë Rafale

Presidenti ukrainas Volodymyr Zelensky dhe presidenti francez Emmanuel Macron nënshkruan sot një deklaratë qëllimi për të bashkëpunuar në sektorin e mbrojtjes.

Zelensky konfirmoi se Ukraina synon të blejë 100 aeroplanë luftarakë Rafale të prodhuar nga kompania franceze Dassault.

Përveç kësaj, Ukraina do të blejë gjithashtu dronë, sisteme mbrojtjeje ajrore dhe pajisje të tjera nga Franca gjatë 10 viteve të ardhshme, si pjesë e përpjekjeve për të forcuar sigurinë afatgjatë të vendit.

Zelensky tha se dokumenti përfaqësonte “një marrëveshje historike” në një konferencë të përbashkët për shtyp me homologun e tij francez Emmanuel Macron, në pallatin presidencial Élysée.

“Së pari, Ukraina do të jetë në gjendje të marrë 100 avionë luftarakë Rafale dhe radarë francezë shumë të fuqishëm, tetë sisteme të mbrojtjes ajrore SAMP/T, secila me gjashtë sisteme lëshimi”, tha Zelensky.

Sipas raportimeve, bëhet fjalë për aeroplanë të gjeneratës 4.5 që konsiderohen si një nga aeroplanët më të përparuar evropianë.

Gjatë vizitës së tij në bazën ajrore Villacoublay, Zelensky inspektoi armët e përparuara franceze, duke përfshirë aeroplanët luftarakë Rafale dhe sistemin e mbrojtjes ajrore SAMP/T.

Parisi ka qenë një aleat kyç i Ukrainës që nga pushtimi në shkallë të plotë në vitin 2022 dhe u ka dërguar ukrainasve aeroplanë luftarakë Mirage 2000, artileri, raketa SCALP me rreze të gjatë veprimi dhe të tjera.

Udhëtimi i Zelenskyt është pjesë e një turneu midis aleatëve evropianë, ndërsa ai kërkon të forcojë mbështetjen për Kievin përballë sulmeve ruse në rrjetin elektrik të Ukrainës.

LEXONI GJITHASHTU:

• Zelensky nënshkruan marrëveshje me Greqinë për furnizim me gaz amerikan
• Zelensky i kërkon Rusisë shkëmbimin e 1200 të burgosurve ukrainas