Zelensky: Rusia po përpiqet të ndalojë takimin për paqe dhe të zgjasë luftën

Presidenti i Ukrainës, Volodymyr Zelensky, ka akuzuar Rusinë se “po bën gjithçka që mundet” për të parandaluar një takim me Vladimir Putinin, në përpjekje për t’i dhënë fund luftës.

Presidenti i SHBA-së, Donald Trump, është përpjekur t’i bashkojë të dy udhëheqësit, por të premten tha se “kjo është si vaji me uthullën… ata nuk shkojnë shumë mirë me njëri-tjetrin”.

Ministri i Jashtëm rus Sergei Lavrov tha se Putin ishte gati të takohej me udhëheqësin e Ukrainës “kur axhenda të jetë gati për një samit, dhe kjo axhendë nuk është aspak gati”, duke akuzuar Zelenskyn se tha “jo për gjithçka”.

Pas një jave intensive diplomacie, në të cilën Trump takoi fillimisht Putinin në Alaska dhe më pas Zelenskyn me udhëheqësit evropianë në Uashington, presidenti amerikan tha se lufta po rezultonte të ishte më e vështira që ai ishte përpjekur të ndalonte.

Trump tha pas një telefonate me udhëheqësin rus të hënën se kishte filluar përgatitjet për një samit Putin-Zelensky, të cilit do t’i bashkohej më pas.

Presidenti i Ukrainës e ka mbështetur këtë veprim, por ai ka kërkuar garanci sigurie nga aleatët perëndimorë për të parandaluar çdo sulm të ardhshëm rus në rast të një marrëveshjeje paqeje: “Ukraina, ndryshe nga Rusia, nuk ka frikë nga asnjë takim midis udhëheqësve”.

Gjatë një vizite në Kiev, Sekretari i Përgjithshëm i NATO-s, Mark Rutte, tha se Trump synonte të “thyente bllokimin” dhe se aleanca po punonte për garanci të forta sigurie me SHBA-në dhe Evropën për të siguruar që Putini “nuk do të përpiqet kurrë më të sulmojë Ukrainën”.

LEXONI GJITHASHTU:

• Lavrov: Trupat evropiane në Ukrainë krejt të papranueshme
• Protesa masive në Gjeorgji kundër pushtimit të Ukrianës