Zelensky takon Biden, presidenti amerikan i premton më shumë armatime anti-ajrore

I ftuar në Shtëpinë e Bardhë, Volodymyr Zelensky mori nga Joe Biden premtimin për më shumë armatime anti-ajrore, përveç tankeve “Abrams” që Ukraina do të marrë së shpejti.

Zelensky mësoi gjithashtu nga Biden frikën se republikanët mund të vënë në rrezik ndihmën e vazhdueshme që SHBA i kanë dhënë vendit që nga nisja e pushtimit rus. Më tej, në këtë takim, presidenti Biden vlerësoi kurajën e popullit Ukrainas.

“Zoti president, populli guximtar i Ukrainës, dhe kjo nuk është një hiperbolë, ka treguar një kurajë të jashtëzakonshme. Ju keni frymëzuar botën me vendosmërinë tuaj për të mbrojtur të gjitha parimet e një vendi. Së bashku me partnerët dhe aleatët, Amerika është e vendosur të bëjë gjithçka që mundet për t’u siguruar që bota të jetë në anën tuaj. Ky është objektivi ynë kryesor”, tha Biden.

“Faleminderit për ftesën. Dialogu ynë i rregullt ka treguar se vendet tona janë aleate të vërteta edhe në nivel strategjik. Ne e vlerësojmë shumë mbështetjen jetike që Shtetet e Bashkuara i kanë dhënë Ukrainës për të luftuar terrorin rus, një terror i vërtetë”, u shpreh Zelensky.

Por pavarësisht premtimeve, Zelensky po largohet nga Uashingtoni pa raketat me rreze të gjatë veprimi që kishte kërkuar. Shtetet e Bashkuara i kanë dhënë Ukrainës 100 miliardë dollarë ndihma, 43 miliardë prej të cilave në armë.

LEXONI GJITHASHTU:

• Zelensky thotë se kishte bisedime konstruktive me ligjvënësit amerikanë
• Zelensky në KS: Vendet që mbështesin agresionin të përjashtohen nga OKB